INFANTIL 3 ANOS B

NOVO BLOGUE CURSO 2009-2010

2009-10-21T12:37:00.000-07:00

Aquí vos deixo a dirección do meu novo blogue:
http://golfinhosdomasma.blogspot.com.

VOLTA AO COLE

2009-08-23T18:08:00.000-07:00

CHEGOU O MOMENTO

2009-07-02T14:55:00.000-07:00

Creo que agora si chegou o momento de dicir adeus. Estiven deixando pasar o tempo porque, se son sincera, non quería enfrentarme a este momento pero o curso rematou e con el remata tamén este blogue. Blogue que comezou sen saber moi ben o que ía resultar pero penso que foi unha idea fantástica e a través del compartimos familia-nenos/as-mestra un montón de vivencias e experiencias.
Douvos as grazas por seguilo día a día, polos vosos comentarios e polos vosos ánimos. Sen vós, pais e nais, non sería posible. GRAZAS.
GRAZAS tamén a vós, os meus peques que tanto me destes sen darvos conta. GRAZAS polos vosos bicos e apertas desinterasados, polos vosos sorrisos, pola vosa inocencia... Non cambiedes nunca. GRAZAS.
E non poido tampouco esquecer aos meus compañeiros. Cada un, á súa maneira, foime dando o mellor de si. GRAZAS polo voso apoio incondicional, pola vosa axuda, pola vosa experiencia e sobre todo polo voso compañeirismo e amizade. GRAZAS Mª DEL MAR, SUSI, BASI, ANA, ROCIO E MAR. GRAZAS DE TODO CORAZÓN.
Marcho de Ortigueira pero podedes estar seguros que todos e cada un de vós ocupades un pedaciño do meu corazón.
Sorte a todos e ata vernos.
Bicos da profe Cris.

INFORMACIÓN

2009-07-02T13:00:00.000-07:00

En breves momentos aparecerá unha entrada no blogue que servirá de peche do mesmo pero a miña intención é seguir poñendo cousas nel, non sei se como entradas pero algo máis poñerei.
Seguirá en activo ata o día 31 de Agosto, ese día deixarei de publicar nel aínda que quedará na rede.

ULTIMO DIA DE COLE

2009-06-22T12:26:00.000-07:00

Hoxe si que foi o último día. Hoxe si que nos iamos despedir de verdade pero non para sempre.
E por ser hoxe o último día, tiñamos unha xornada chea de sorpresas. Comezamos a mañá cun concerto que nos ofreceu a Escola Municipal de Música, sendo protagonistas algúns dos nosos compañeiros/as de Infantil. Gustounos moito ademais de aprender o nome de algún instrumento que non coñecíamos.
Xa de volta ao cole tiñamos unha SOPRESA. Si, si, unha Sorpresa: os nosos mestres de Infantil tíñannos preparada unha representación teatral, nin máis nin menos que O Coelliño Branco escenificado polos nosos profes. Foi moi gracioso velos a todos metidos no seu papel e vestidos de Coelliño Branco, Can, Boi, Galo, Cabra Cabresa, Formiga Rabiga e un simpático narrador. A todos dámoslles as GRAZAS.
Despois do teatriño a xogar ao patio. Ao final a profe Cris deunos un video que nos preparou con esmero e cariño e no cal recordaba algunha das moitas cousas que fixemos ao longo do curso a través de fotos.
A verdade é que a cousa non puido ser mellor para rematar o curso. Agora vacacións e a descansar que en Setembro hai que volver con gañas de seguir aprendendo.
BO VERÁN A TODOS E TODAS!!!

UN NOVO BLOGUE

2009-06-21T11:39:00.001-07:00

Que agradable sorpresa me levei con este novo blogue creado pola mamá de Ismael. Podedes visitalo en http://anamourente.blogspot.com.

FESTIVAL DE FIN DE CURSO

2009-06-21T08:22:00.000-07:00

O pasado xoves, tal e como estaba previsto, celebrouse no Teatro de Beneficiencia de Ortigueira o Festival de Fin de Curso. Educación Infantil e 1º ciclo de Educ. Primaria actuaron nun primeiro turno mentres que os alumnos/as de 3º, 4º, 5º e 6º fixérono nun segundo turno. Ás 10:30 chegabamos ao teatro para dar comezo a gran actuación. Os primeiros en actuar fomos nós, por ser os máis pequenos. Ataviados cunhas "chulas" camisetas subímonos ao escenario e bailamos mellor que nunca o noso "Popurri das mans". Aplaudíronnos moitísimo porque a verdade é que o fixemos moi pero que moi ben. Despois de nós tocoulles aos compañeiros/as de 4 anos que con moita marcha e cunhas gorras de cores bailaron o Hocky Pocky. A continuación subiron ao escenario os nenos e nenas de 5 anos. Eles prepararon un baile moi moderno para unha canción en lingua inglesa que se titulaba "These boots are made for walking" que quere dicir algo así como "Estas botas están feitas para camiñaar". Fixérono moi ben aínda que algún despistouse un pouco, jejejjeje. Tamén bailaron coa profe de música, Gloria, a canción "Soy una taza". E con esto rematou o turno de Educación Infantil pero aínda quedaban as actuacións de 1º e 2º. "El arca de Noé" ou "Tengo una vaca lechera" foron algunhas das cancións que bailaron os nenos e nenas de 1º. Os rapaces e rapazas de 2º sorprendéronnos cuns recitados e cun fermoso baile ao son da tan actual canción "Colgado en tus manos" interpretada por Carlos Baute e Marta Sánchez. Finalizada a nosa parte voltamos ao colexio. Agora era o turno dos maiores, non puidemos velos pero contáronnos que houbo moitos bailes, teatro... Coma sempre podedes ver as fotos do evento facendo clic aquí e ademais deixámosvos un video da nosa actuación para que comprobedes cos vosos propios ollos o ben que o fixemos.

FELIZ CUMPREANOS HELENA, ALEX MARTÍNEZ E TONI!!!

2009-06-18T13:44:00.000-07:00

Onte a profe sorprendeunos cun biscoito para celebrar os aniversarios dos nenos que cumpren anos durante o verán e que son Helena, Alejandro Martínez e Toni. Foi moi gracioso velos aos tres soprando as candeas e coma sempre finalizamos cantando o tan coñecido "Cumpreanos Feliz"
Pero a sorpresa non quedaba aí, a profe tamén soprou as candeas xa que nos dixo que o seu cumpre é en Agosto.
Así que Felicidades aos catro por adiantado.

FESTA ITALIANA

2009-06-13T14:38:00.000-07:00

A verdade é que neste final de curso non paramos e cada día temos algunha actividade. O venres rematamos a semana cunha Festa Italiana que contou coa presencia de Marco delle Monache, un coñecido acordeonista de Roma. Marco sorprendeunos tocándonos co acordeón a canción que temos preparada para o Festival de Fin de Curso e nós correspondímoslle bailándoa. Tamén os nenos e nenas de catro anos bailaron ao son do acordeón, ata se atreveron cunha Muiñeira. Pero a actuación estelar foi a dos compañeiros de 5 anos que tiñan preparada unha Tarantela, baile típico de Italia, en homenaxe a Marco.
Despois de tanto baile tocou comer. Os nosos profes tíñannos preparados diferentes tipos de pasta así como de queixos italianos xunto con algún dos nosos queixos galegos e de algún chourizo. Que rico estaba todo!!!
Pinchade aquí e veredes o ben que o pasamos.

PARABÉNS MANUEL

2009-06-13T14:24:00.000-07:00

O venres e un día antes da data oficial, Manuel celebrou o seu aniversario cos seus compañeir@s. E para celebralo con todas as da lei houbo biscoito(riquísimo por certo), coroa, candeas e a entoación do Cumpreanos Feliz.
A vindeira semana imos a ter un cumpreanos múltiple xa que a profe prometeunos celebrar os aniversarios de aqueles nenos e nenas que cumpren os anos durante o verán. Pero ademais tamén imos celebrar o cumpre da profe, que é en Agosto, pero non digades nada que ela non o sabe...

NENOS E NENAS DA GALESCOLA

2009-06-13T14:19:00.000-07:00

Tamén o xoves nos visitaron os nenos e nenas da Galescola que o vindeiro curso 09/10 virán por primeira vez ao "cole dos maiores" como din eles.
Pasámolo moi ben todos xuntos ensinándolles as súas futuras aulas e o patio. E eles amosáronse moi contentos de estar no noso cole e case parecía que estiveran nel toda a vida.
Como xa fixeran o ano pasado, trouxéronnos un agasallo: uns murais realizados por eles mesmos coa axuda das súas profes.
Desde aquí queremos agradecerlles a súa visita e esperamos que se repita durante moito tempo.

VISITA DE VERDEROLO

2009-06-13T14:00:00.000-07:00

O pasado xoves, e despois de tanto oir falar del, por fin poidemos ver en persoa a Verderolo. Durante este curso os nosos compañeiros e compañeiras de 5 anos descubriron o Universo coa axuda dun ser extraterrestre chamado Verderolo, o cal xa visitara o noso cole nunha primeira ocasión pero nós non o víramos.
Pero o xoves Verderolo quixo coñecernos a tod@s e aproveitou para falarnos da importancia de non malgastar a auga, un recurso tan necesario nas nosas vidas, así como efectos negativos que produce o tabaco para a saúde.
Os nenos e nenas de tres anos atrevímonos a facerlle algunhas preguntas e así aprendimos que Verderolo viaxe nunha nave espacial desde o seu planeta de orixe, Catón.
Tod@s atendimos con expectación ás explicacións de Verderolo e máis dun non podía deixar de abrir os ollos e a boca do impresionado que estaba.
As fotos falan por si soas.

CARTA DE CHUS DOVALE

2009-06-10T07:39:00.000-07:00

Onte recibín no meu correo electrónico unha carta. A persoa remitente, Chus Dovale nai de Paula, pedíame que a publicase no noso blogue. Desta maneira transmito as verbas de Chus e desde aquí doulle MIL GRAZAS.

Esta carta está dirigida a la maestra de mi hija Paula y autora de este blog, se llama Cristina, aunque le decimos cariñosamente "Cris".

Parece que fue ayer cuando nos reunimos los padres por primera vez con ella al comienzo de esta nueva etapa y ahora faltan pocos días para terminarse el curso. El inicio fue bastante duro para mi, pues tienes que dejar en el colegio parte de tu propia vida, lo que más se quiere en el mundo y las dudas eran muchas: ¿serán cariñosos con ellos?, ¿como les enseñarán?, pero las respuestas no tardaron en llegar al ver la cara de mi hija todos los días a la hora de entrar en el cole y al comprobar día a día todo lo que iba aprendiendo: a contar, las letras del abecedario, escribir su nombre, los días de la semana, así como también normas de comportamiento y educación. Este es el legado que les deja su profe "Cris", a la que echaremos de menos pero al mismo tiempo nos alegramos por quienes el año que viene tengan la suerte de tenerla como profe.

Gracias Cristina, simplemente con estas palabras quería agradecerte todas las horas de dedicación, paciencia y cariño que tuviste para tus alumnos que siempre te recordarán con mucho cariño.

Te deseo mucha suerte y siempre recordaremos a la profe "Cris".

Supoño que con esta carta vos daredes conta que o ano que ven xa non estarei en Ortigueira. O meu vindeiro destino é Mondoñedo e non poido negar que é algo desexado por min xa que con este destino acércome á miña casa. Pero tamén sería inxusto negar que me vou de Ortigueira con moita tristura.

Pero o curso aínda non se acabou, faráoo o día 22 de Xuño, e ata esa data non quero despedidas nin bágoas que aínda nos queda máis dunha semana de moito traballo. O resto chegará no seu momento.

De tódolos xeitos si vos poido dar as grazas a todos e todas, pais e nais, nenos e nenas. GRAZAS.

E tamén Grazas a ti Chus por esta carta tan emotiva. Verbas como as túas fanme pensar que, a pesar de cometer moitos erros, realizo o meu traballo o mellor que poido. Grazas outra vez.

PARABÉNS JAVIER

2009-05-25T10:15:00.000-07:00

Hoxe celebramos o aniversario de Javier. Por iso trouxo un rico biscoito que comparteu cos seus compañeir@s. Coma sempre, houbo coroa, candeas e o tan ansiado "Cumpreanos Feliz.
Desde o noso blogue desexámoslle que cumpra moitos máis.

MÁIS FOTOS DOS MAIOS

2009-05-21T10:34:00.000-07:00

Deixámosvos máis fotos da festa dos Maios. Foron feitas por Marta, a mamá de Javier, e por iso lle damos as grazas. É unha honra ter un mamá fotógrafa na aula.
Pinchade aquí para ver as fotos.

OS MAIOS

2009-05-20T14:20:00.000-07:00

Como xa sabedes tod@s, hoxe celebramos Os Maios. Dita celebración nace o curso pasado a iniciativa do Asilo de Anciáns de Ortigueira pretendendo que a festa servise de unión interxeracional. Deste xeito celebrouse o I Encontro participando nel os pequerrechos da Galescola, os avós e avoas do Asilo, os rapaces de Aspromor, algún que outro alumno/a do Instituto e por suposto, os nenos e nenas do CEIP José Mª Lage.

Este ano volvimos ás andadas. Fai uns días que preparamos a festa. Estivemos preparando unhas flores moi bonitas que despois as deixamos quedar na baranda da Praza de Isabel II, que foi onde tiveron lugar Os Maios. Tamén recollimos pétalos de flores para poder elaborar unha fermosa alfombra.

A xornada estivo repleta de xogos, música e moi bo ambiente podendo tod@s disfrutar dun soleado día na nosa vila.

Os nosos mestres leváronnos as merendas e tiñánnos preparada unha sorpresa: iamos ir a merendar ao parque e despois poidemos disfrutar dun momento de lecer nos xogos que hai nos Xardíns do Malecón.

Voltamos ao cole moi cansos pero moi contentos e satisfeitos de ter participado por primeira vez(pero non última)na festa dos Maios.

Deixámosvos unhas instantáneas para que vexades cos vosos propios ollos todo o que aconteceu e ademáis podedes velas mellor facendo clic aquí.

P.D.: Xa nos esquecíamos dunha cousa: Tamén nos deron uns ricos caramelos!!!

LETRAS GALEGAS 2009

2009-05-17T08:38:00.000-07:00

Como xa vos dixemos, o pasado venres 15 de Maio celebramos no colexio o Día das Letras Galegas cunha xornada chea de actos.

Pola mañá nada máis chegar marchamos para o Teatro. Os nenos/as de 5 anos foron os encargados de levarnos da man e por parellas. Fixérono moi ben e coidaron de nós, desde aquí dámoslles as GRAZAS. Unha vez que estivemos no Teatro visionamos a segunda parte da película "El bosque animado" en lingua galega.

Xa pola tarde xuntámonos tod@s no patio do colexio. Primeiro dous compañeiros faláronnos de Ramón Piñeiro e despois poidemos disfrutar dos bailes tradicionais galegos que prepararon con esmero as rapazas do grupo de baile de San Adrián xunto coa súa mestra Nuria. Entre elas tiñamos á nosa compañeira Noa, da clase de 5 anos B.
Xa para rematar, estaba previsto cantar entre tod@s o Himno Galego pero a choiva impediunos rematar a xornada según o programado.

E esto foi todo o que, desde o CEIP José Mª Lage, fixemos para conmemorar un día tan importante para a nosa lingua como é o Día das Letras Galegas.

Se queredes ver as fotos deste día, facede clic aquí.

PARABÉNS DAMIÁN E NEREA

2009-05-14T05:37:00.000-07:00

O pasado 12 de Maio o noso compañeiro Damián cumpreu 4 anos. Trouxo un biscoito riquísimo para compartir con tod@s nós e celebrar así o seu aniversario.
E hoxe foi o turno de Nerea que, ao igual que Damián, tamén trouxo outro gran biscoito.
Sopramos as candeas, cantamos o Cumpreanos Feliz e compartimos con eles un día tan especial.
Felicidades aos dous.

DIA DAS LETRAS GALEGAS

2009-05-13T11:31:00.000-07:00

O día das Letras Galegas celébrase, como xa sabedes, o día 17 de Maio. Aló polo ano 1963, a Real Academia Galega acordou que todos os 17 de Maio se homenaxearía a aquelas persoas que destacasen pola súa creación literaria en lingua galega ou pola súa defensa de dita lingua. Cada ano adícase a unha persoalidade diferente que é escollida pola Real Academia Galega, tendo en conta que se esixen polo menos dez anos desde o seu falecemento.

Escolleuse esa data xa que ese mesmo día pero do ano 1863, publicouse en La Habana o primeiro exemplar de "Cantares Gallegos", de Rosalía de Castro, marcando así o inicio do "Rexurdimento" ou renacemento cultural do galego.

Algunhas das figuras homenaxeadas son Rosalía de Castro, Castelao, Curros Enríquez, Álvaro Cunqueiro, Otero Pedrayo, Celso Emilio Ferreiro, Eduardo Blanco Amor, ...

Este ano o autor homenaxeado é Ramón Piñeiro López.

CANTO TEMPO!!!

2009-05-13T11:22:00.000-07:00

Xa pensaríades que nos esqueceramos do blogue!!!
Pois non, acordámonos todos os días pero é que despois da ponte andivemos algo liados xa que estivemos preparando os traballos para a Revista Escolar, que sacará novo número a finais de curso. A verdade é que a nosa aportación quedou moi ben pero non vos imos dicir nada así queda en suspense...
Por outro lado, tamén preparamos o Día das Letras Galegas que, aínda que son o día 17 de Maio, no cole ímolas celebrar o venres día 15 e durante toda esta semana estamos aprendendo moitas cousas do autor homenaxeado este ano.
Tamén este mes temos moitos cumpreanos. Mañá teremos fotos dos dous que celebramos esta semana.
Como vedes non paramos de traballar e de aprender cousas.

P.D.: Por certo, esquecíamos dicirvos que para o Festival de Fin de Curso estamos ensaiando algo moi "guay" que seguro vos vai gustar.

PONTE

2009-04-29T15:11:00.000-07:00

Recordade que o Venres 1 de Maio non haberá clase ao igual que o Luns día 4 do mesmo mes.
Así que a disfrutar destes días de descanso que despois quédanos a recta final.
Pasádeo ben.

GRAZAS

2009-04-28T14:04:00.000-07:00

Grazas polas vosas visitas, que xa van 2000, e grazas polos vosos comentarios. Grazas polos vosos ánimos, pola confianza que depositades día a día en min, grazas por deixarme os vosos tesouros. Grazas de verdade.

P.D.:Escoitade a canción.

PARABÉNS OU!!!

2009-04-27T13:08:00.000-07:00

Hoxe está de cumpreanos Ou e para celebralo trouxo un gran biscoito para compartir con tódolos seus compañeir@s de 3 anos e por eso viñeron á nosa clase os nenos e nenas da profe Susi.
Tamén nos trouxo unhas riquísimas moedas de chocolate!!

DIA DO LIBRO

2009-04-23T12:24:00.000-07:00

O 23 de Abril conmemórase o falecemento de 3 escritores: o español Miguel de Cervantes y Saavedra, o inglés William Shakespeare e o cronista Garcilaso de la Vega. Por este motivo a Unesco, no ano 1995, aprobou proclamar o 23 de Abril de cada ano o "Día Mundial do Libro e dos Dereitos de Autor".

En España a xornada comezouse a celebrar oficialmente o 7 de Outubro de 1926, en conmemoración do nacemento do autor de "El Quijote".

No 1930, a data trasládase ao 23 de Abril, día do falecemento do citado autor, Cervantes.

Finalmente foi o 15 de Novembro de 1995 cando a Unesco proclamou ese día como o "Día Internacional do Libro e dos Dereitos de Autor".

No noso país, este mesmo día, entrégase o Premio Miguel de Cervantes.

Ademáis esta xornada é aproveitada por moitos autores para promocionar o seu último libro. Tamén os editores e libreiros acostuman facer descontos especiais na venta de libros.

Como nota curiosa, dicir que en Cataluña celébrase o Día do Libro de maneira especial ao coincidir coa celebración de "Sant Jordi". É costume que os homes agasallen ás mulleres con rosas e elas a eles con libros.

E todo este rollo para dicirvos que nós tamén celebramos o Día do Libro e por iso coloreamos uns simpáticos marcapáxinas que serán expostos na biblioteca do cole. Tamén neles escribimos o título do conto que máis nos gustou de todos os que levamos para a casa ao longo do curso. Pinchade na imaxe e poderedes ver o noso traballo.

OS MÉRCORES... BIBLIOTECA

2009-04-22T05:41:00.000-07:00

Como xa sabedes tódolos mércores, e xunto coa profe Ana, facemos unha visita á Biblioteca do noso Cole.
Cada semana levamos un conto para a casa para lelo coa axuda de papá e mamá. A nosa profe Cris anótanos nunha ficha o libro que levamos e recórdanos que o temos que traer antes do seguinte mércores para poder levar outro.
Xa sabemos que na biblioteca hai que estar en silencio e que temos que coidar os contos que levamos xa que así os poderemos usar tod@s.
Unha vez que volvemos á aula, gardamos con coidado os contos nas nosas mochilas.
Gústanos moito ir á Biblioteca e ler e escoitar contos!!!

NOVOS BLOGUES

2009-04-19T02:24:00.000-07:00

Infórmovos de que no noso espazo adicado aos nosos Blogues Amigos, temos enlazados dous novos blogues.
Un deles, chamado A NOSA CLASE, pertence aos nen@s dunha clase de infantil do CEIP Ponte dos Brozos de Arteixo e que xunto co seu mestre Jose Carlos ensínannos cousas moi interesantes.
O outro, HABLAPORMIDICEIAGO, é o diario dun neno autista chamado Iago. Só vos digo que merece a pena visitalo e reflexionar sobre o que somos e temos.
Espero que vos gusten.

EXCURSIÓN Á CASA DO QUEIXO

2009-04-19T01:28:00.000-07:00

Despois de tanta impaciencia, chegou o tan esperado día da Excursión á Casa do Queixo. A ningún lle importou madrugar, e tod@s moi puntuais estabamos ás 9 no colexio para subirnos ao bus e partir cara o noso destino.
Fixemos unha boa viaxe a pesar da incesante choiva que nos acompañou durante case todo o percorrido.
Unha vez que chegamos á Casa do Queixo, e despois dunha máis que obrigada visita ao servicio, os monitores repartíronnos en diferentes grupos para comezar unha intensa xornada de actividades:
- Visitamos os animais da granxa atendendo moi ben ás explicacións. Poidemos saber cousas das avestruces, ovellas, galiñas, cabras, vacas, cabalos, coellos, ponis...
- Fixemos divertidos xogos.
- Plantamos fresas, perexil e leitugas nuns minis invernadoiros que logo trouxemos para o colexio.
- Elaboramos unhas bruxas da sorte con materiais naturais e de refugallo: landras, garavanzos, fios...
- Aprendimos a cardar e fiar a lá.
- Descubrimos o proceso de elaboración do queixo fresco e agora xa sabemos que ademais do leite necesitamos tamén sal e callo(cuajo).
Á hora do xantar portámonos moi ben e coa axuda dos nosos profes repuxemos forzas para seguir coas actividades que nos quedaban por facer.
Foi unha mágoa cando tivemos que voltar ao bus para emprender a viaxe de volta a Ortigueira, na cal máis dun se quedou durmido, algo normal despois dun longo e atípico día na Casa do Queixo.
Facede clic aquí para ver as fotos.

EXCURSIÓN

2009-04-14T14:59:00.001-07:00

Xa só queda un día para a excursión e polo tanto imos recordar unhas cantas cousiñas:

1º.- Lembrade que a hora de saída é ás 09:00 h. Sairemos do aparcamento dos autobuses e polo tanto reunirémonos alí.
2º.- Temos que levar roupa e calzado cómodo. Tamén unha gorra(por se sae Lorenzo) ou un chuvasqueiro(tendo en conta o tempo que estamos tendo).
3º.- Levaremos algo para comer a media mañá(coma se fose a merenda para o cole) así como o xantar(Mamis non vos pasedes que só imos un día, non sete).
4º.- Mamás e Papás: as actividades son en interiores así que non vos preocupedes pola choiva. Non nos mollaremos!
5º.- Por se nos mareamos, tomade a pastilla antimareo e levade outra para a volta(a profe encargarase de que a tomen).
6º.- A hora de chegada sempre é aproximada, polo tanto non vos preocupedes se hai algún retraso aínda que procuraremos que non ocurra.
7º.- E por último: traer gañas de desfrutar dun día atípico e de aprender moitas cousas.
8º.- Esta si que é a última: o día anterior temos que deitarnos ben cediño para vir moi pero que moi descansados.

Ata mañá.

A NOSA AXENDA

2009-04-12T09:38:00.000-07:00

Imos ensinarvos a Nosa Axenda, a cal consta de tres partes. A primeira delas é o Diario Anecdotario. Nel cada luns contamos e ilustramos o que fixemos durante a fin de semana.

Na segunda das partes sinalamos as Datas Importantes de cada mes: cumpreanos, celebracións, vacacións...

En último lugar temos o Listín Telefónico. Aquí compoñemos os números de teléfono dos nosos compañeiros e compañeiras para poder utilizalos se algún día os queremos chamar para convidalos á nosa casa.

PREMIO LIMONADA

2009-04-08T06:05:00.000-07:00

Pois si, recibimos outro premio de mans da profe Bea e os seus Ratiños. Así de fresco nos chega desde O Rosal e nós desde Ortigueira dámoslles as GRAZAS!!!

Aquí van as normas deste premio:
1. Poñer o logo no post ou no blogue.
2. Nominar alomenos outros 5 bloguess que amosen gran actitide ou gratitude.
3. Asegurarse de enlazar ben ós nominados no post.
4. Facerlles saber que recibiron este premio mediante un comentario no seu blogue.
5. Esparcir o amor e non esquecerse de enlazar a quen che premiou.

E nós imos outorgar o PREMIO LIMONADA a:
1.- Rocío: http://infantilortigueirarocio.blogspot.com
2.- Ana: http://aclasedeana.blogspot.com
3.- Clase de 5ºB do Couceiro Freijomil: http://superquintob.blogspot.com

AOS MEUS COMPAÑEIROS DE INFANTIL

2009-04-05T08:31:00.001-07:00

Uploaded on authorSTREAM by angelpuente

VACACIÓNS

2009-04-03T09:21:00.002-07:00

ScrollFxgreat free widgetsWidgetbox

Recórdovos que o periodo de vacacións é do 4 ao 13 de Abril, ámbolos dous inclusive. Aproveito para desexarvos que pasedes unhas boas vacacións.

PREMIO AGARIMOSO

2009-03-30T05:46:00.000-07:00

Que alegría nos levamos na aula de 3 Anos B cando recibimos este Premio Agarimoso desde Pontedeume. Por iso lle queremos dar as grazas aos rapaces e rapazas de http://superquintob.blogspot.com do CEIP Couceiro Freijomil e tamén queremos mandarlle un bico especial ás Foquiñas e á súa profe Ana Álvarez.

E agora tócanos a nós continuar:

As reglas a cumplir son as seguintes:
1- Facer link co blogue da persoa que cho otorgou
2- Escribir as reglas do mimo no teu blogue
3- Contar 6 cousas aleatorias sobre ti
4- Outorgarlle o mimo a 4 persoas máis e enlazalos
5- Deixarlle un comentario ou aviso a quen llo outorgaras
6- Deixar aos obsequiados saber cando publicaches o post

Unha vez chegado ao punto 3, pois aí van 6 cousiñas sobre min:

- Son unha amante da miña terra, Foz, aínda que no meu corazón levo un pedaciño de Ortigueira.
- Gústame o baloncesto e son a afecionada número un do CB Celtas, que é o equipo de Foz e que ademais formo parte da súa directiva.
- Colecciono almanaques pequeniños e postais.
- Algo que me gusta moito moito é cantar aínda que non o faigo ben. Sei unha morea de cancións pero as que máis me gustan son as rancheiras.
- Outra das miñas paixóns é facer punto de cruz, reláxame un montón.
- O chocolate é a miña perdición.

Os nosos premios agarimosos son para...

1.- Para Mar,http://infantilortigueiramar.blogspot.com , por todo o que me ensina día a día e por facer de "mami" tantas veces. GRAZAS MAR.
2.- Para Ana, http://infantilortigueiraana.blogspot.com, para que non se desanime co blogue. Ánimo!!!
3.- Para Basi, http://infantilortigueirabasi.blogspot.com, porque se non fora por el, non tería creado o blogue. Grazas por aguantarnos tan ben a todas.
4.- Para Mar Polo, http://infantilortigueira.blogspot.com, polos seus apoios e sobre todo pola súa paciencia. Grazas a ti tamén.

GRAZAS A TOD@S

2009-03-23T13:46:00.000-07:00

Os nenos e nenas da profe Cris queremos darvos ás gracias polas MIL visitas que realizastes ao noso blog. Estamos moi contentos de que vos guste e esperamos que sigades visitando o noso peque-espazo internauta e que deixedes moitos comentarios como os que deixastes ata o de agora.

A HORA DA MERENDA

2009-03-22T09:13:00.000-07:00

Como ben sabedes, cada día adicamos un espazo de tempo na nosa xornada escolar á merenda. É un momento distinto e especial xa que marca outro momento moi desexado por tod@s que é o recreo. Pero non por ser distinto e especial deixa de ser importante e nel poñemos en práctica unha serie de hábitos, normas e costumes. Sabemos que para comer temos que estar ben sentados, que temos que tirar na papeleira os papeis ou restos de comida e que temos que deixar o noso sitio limpo e recollido.
Ademais de todo isto, temos un calendario de merendas. Os luns e xoves, levamos bocata; os martes e venres, froita; e os mércores, galletas ou pauiños de pan.

SEMANA DA PRENSA

2009-03-12T11:35:00.000-07:00

Esta semana estivo adicada á Prensa e polo tanto ao longo dela fixéronse diferentes actividades.
Nós destinamos o xoves para aprender algo sobre a prensa. A profe Cris trouxo periódicos á aula pero engañounos un pouco. Resulta que abreu un periódico e púxose a contar o conto do Coelliño Branco. Despois preguntounos se aquelo era un conto e nós dixémoslle que non. Algún dixo que era unha revista pero outro dixo moi rápido que era un "peródoco" e que o lían os maiores. Unha vez que soubemos como se chamaba aquelo que a profe tiña nas mans, preguntounos que sería o que alí se contaba. Uns dixemos que salía fútbol e outros tenis. Cris explicounos que o que podíamos ler eran diferentes noticias, tamén deportivas.
Hoxe coñecimos e manipulamos diversos periódicos como La Voz de Galicia, El Mundo, El Correo Gallego e tamén o periódico local La Voz de Ortigueira no que poidemos ver aos nosos compañeiros de 5º disfrazados de homes prehistóricos.
Despois de falar da prensa, a profe deixounos os periódicos na Biblioteca da aula para que os mirásemos e nós así o fixemos.

BLOG DE PSICOMOTRICIDADE

2009-03-12T06:51:00.001-07:00

Xa podedes visitar o Blog da profe Mar, no cal poderedes ir vendo como os vosos fill@s progresan no ámbito psicomotor.
Desde a aula de 3 anos B, queremos darlle a benvida a este mundo blogueiro á profe Mar.

PROXIMAMENTE...

2009-03-11T12:13:00.000-07:00

Informámosvos que en poucos días abrirase o Blog da aula de 3 anos A. A profe Susi está traballando para que cando se poña en marcha teñades cousiñas nel.

CASA DO QUEIXO

2009-03-10T14:24:00.001-07:00

No apartado "WEBS DE INTERESE", deixámosvos o enlace para que vexades A Casa do Queixo, que é a onde iremos de excursión o día 16 de Abril. Xa vos iremos dando máis información en vindeiros días.

NEREA E LORENA

2009-03-10T14:14:00.000-07:00

A pasada semana tamén chegou nova ao noso cole, Lorena. Ela está na clase da profe Ana, 4 anos B, e ven de Cariño.
Como Nerea estuvo coa varicela, non veu ata hoxe ao cole e precisamento hoxe poidemos comprobar o moito que se parece a Lorena ou Lorena a ela.
Para que o comprobedes cos vosos propios ollos deixámosvos mostra fotográfica.

BENVIDO ALEX!!

2009-03-10T13:23:00.000-07:00

Onte día 9 de Marzo, recibimos a un novo compañeiro. El chámase Alex e chega desde Ferrol. A verdade é que Alex adaptouse a nós tan ben que parece coma se levase no noso cole desde setembro.
Todos e todas lle damos a máis das agarimosas benvidas e desexámoslle que esteña moi a gusto entre nós.

NOTA EN RELACIÓN AOS COMENTARIOS

2009-03-04T11:46:00.000-08:00

Os comentarios que facedes tardan en publicarse porque primeiro chegan ao meu correo electrónico e despois xa os publico eu.
Gracias.

CUMPREANOS

2009-03-04T11:19:00.000-08:00

No que vai de curso algúns cumprimos anos e para celebralo levamos á aula un rico biscoito que compartimos cos nosos compañeiros. Tampouco faltou a gran coroa e o típico "Cumpreanos Feliz". A nosa profe inmortalizou o momento así que aí vos van unhas cuantas fotos. Aínda faltan algunhas pero logo irán.

AGRADECEMENTO

2009-03-04T09:17:00.000-08:00

Gracias a todos e todas polas vosas visitas e polos vosos comentarios. Non deixedes de facelo.
E para os meus pequerrechos e pequerrechas, dicirlles que xa estou mellor e que a semana que ven xa estarei con eles outra vez. Traballade moito e sobre todo portádevos ben. Biquiños da vosa profe.

OS VIKINGOS DO ORTEGAL

2009-02-23T06:58:00.000-08:00

E despois de case dous meses de intenso traballo nos nosos disfraces, chegou o gran día da súa estrea. O tempo acompañounos ao igual que os nosos pais e familiares que fixeron con nós todo o percorrido axundando á profe Cris, por iso ela vos dá as GRACIAS.
Polas rúas de Ortigueira había moita xente que quixo disfrutar con nós dunha mañá de entroido chea de cores, música e caramelos que nos repartiron na praza de Isabel II. Os pequerrechos da Galescola, os rapaces e rapazas de Aspromor e os avós da Residencia de Anciáns, tamén formaron parte da comitiva carnavaleira.
Deixámosvos algunhas fotos, aínda que iremos poñendo máis.

O ENTROIDO XA ESTÁ AQUÍ

2009-02-17T06:01:00.001-08:00

Un ano máis xa nos estamos preparando para o Entroido e para ir entrando en materia o noso Meco vainos dando diferentes ordes cada día, así ata o venres que será cando poñamos os nosos disfraces elaborados con esmero para a ocasión e tamén para ensinarllos a todo o mundo polas rúas de Ortigueira.
De momento o Meco deunos dúas ordes: poñer zapatos distintos e poñer do revés a chaqueta ou o xersei.
Nós facémoslle caso ao Meco e para mostra aquí vos deixamos estas fotos. Mirade que guapos estamos cos zapatos diferentes e co mandilón do revés. E como non, a nosa mestra Cris é a primeira, porque ela é unha verdadeira entroideira. Ata nos está ensinando a canción de Carnaval, Carnaval.

PRESENTACIÓN

2009-02-12T17:03:00.000-08:00

BENVID@S AO BLOG DOS NEN@S DE 3 ANOS B

2009-02-12T14:06:00.000-08:00

Ola a tod@s! Dámosvos a benvida ao blog da nosa aula. Nel irémosvos contando todo aquelo que imos facendo na escola: traballos, saídas, experiencias, aventuras... O que pretendemos é facervos partícipes a tod@s do noso gran reto, que non é outro que MEDRAR APRENDENDO.
Agradeceremos os vosos comentarios así como as vosas opinións e aportacións. Pouco a pouco iremos enchendo este espazo internauta para que disfrutedes das nosas cousas ao igual que nós disfrutamos con elas.
Esperamos que vos guste!